Səhiyyənin İnkişafına Dəstək İB (SİD İB) İlkin Səhiyyə Xidmətləri səviyyəsində İcma Əsaslı Səhiyyənin Maliyyələşdirilməsi Modelinin ətraflı təsirləri haqqında Regional Maarifləndirmə və İctimai Vəkilliyə dair Bərdə şəhərində tədbir keçirmişdir.

Tədbirdə Bərdə və Yevlax rayonlarının icra hakimiyyəti, Mərkəzi Rayon Xəstəxanası, Rayon Təhsil Şöbəsi və hədəf icmaların nümayəndələri iştirak etmişdir.

Dəyirmi masa SİD İB-nin Oxfam beynəlxalq humanitar təşkilatının maliyyə dəstəyi ilə digər yerli tərəfdaş təşkilat olan Aran Humanitar Regional İnkişaf Təşkilatı ilə birlikdə həyata keçirdiyi “Məsuliyyətli yerli idarəetmə vasitəsilə sağlam icmaların inkişafı” layihəsi çərçivəsində reallaşmışdır. Dəyirmi masanın keçirilməsində məqsəd adı çəkilən layihə üzrə görülən işlər və onların əhəmiyyəti barədə yerli ictimaiyyəti və əlaqədar təşkilatları məlumatlandırmaq, onların mümkün rolunu müzakirə etməkdir.

Tədbiri giriş sözü ilə açan SİD İB-nin direktoru Mətləb Verdiyev “Məsuliyyətli yerli idarəetmə vasitəsilə sağlam icmaların inkişafı” layihəsi haqqında qısa məlumat verərək bildirmişdir ki, layihə Bərdə, Yevlax, Oğuz, Tərtər, Goranboy, Ağdam rayonlarının 41 icmasını əhatə edir. O, vurğulamışdır ki, layihənin həyata keçirilməsində əsas məqsəd əhalinin İlkin Səhiyyə Xidmətləri (İSX) səviyyəsində tibbi xidmətlərə daha səmərəli çıxışının təmin olunmasıdır.

M. Verdiyev layihənin əsas tərkib hissəsi olan İcma Əsaslı İlkin Səhiyyə Xidmətlərinə Dəstək Modeli (İƏİSXDM) haqqında danışmış və bildirmişdir ki, Model ucqar icmalarda yaşayan əhalinin ilkin səhiyyə xidmətlərindən istifadəyə dair qərar qəbulu proseslərində iştirak etmək, münasib və keyfiyyətli xidmətlər əldə etmək imkanlarını artırır. O, eyni zamanda SİD İB-nin layihə çərçivəsində əsas fəaliyyəti İƏİSXDM-in təbliği və ictimai vəkilliyinin həyata keçirilməsi, İSX səviyyəsində fəaliyyət göstərən tibb işçilərinin bacarıqlarının artırılması üçün müvafiq təlimlərin aparılması və əhalinin maarifləndirilməsi istiqamətində təlim materiallarının hazırlanmasından ibarət olduğunu vurğulamışdır.

M. Verdiyev İƏİSXDM-in əsas komponenti olan İcma Əsaslı Tibbi Sığorta (İƏTS) haqqında məlumat verərək bildirmişdir ki, İƏTS az gəlirli və xüsusilə də rayon və ya şəhər mərkəzlərindən uzaqda yaşayan əhalinin səhiyyə xidmətlərinə çıxışının yaxşılaşdırılmasına kömək edir. O, icma üzvlərinin könüllü olaraq İƏTS sxeminə üzv olmasını və xəstələndikdə İƏİSXDM çərçivəsində pulsuz tibbi xidmət və dərmanlarla təmin olunduğunu söyləmişdir: “Müəyyən müddət hədəf icmalarda dərmanlarla təminat layihə çərçivəsində maliyyələşdirilir, üzvlük haqqından yığılan pullar isə icmanın iştirakı ilə Səhiyyə Komitələri Forumunun (SKF) bank hesabında toplanır və bu vəsait gələcəkdə icmanın sağlamlıqla bağlı problemlərinin həllinə sərf olunacaq”.

Daha sonra Aran təşkilatının İcraçı Direktoru Rauf Əliyev çıxış etmişdir. O, Aranın “Məsuliyyətli yerli idarəetmə vasitəsilə sağlam icmaların inkişafı” layihəsi çərçivəsində gördüyü işlər haqqında məlumat verərək bildirmişdir ki, Aran icmalarda səhiyyə maarifi işlərinin aparılması, tibb məntəqələrinin dərmanla təchizatı, ölüm və xəstəliklərə aid statistikanın toplanılması, həkim briqadalarının icmalara aylıq səfərlərinin təşkili, tibb məntəqələrinin təmiri, bərpası, tikintisi, məntəqə və icmanın içməli su təminatı, məktəblərdə səhiyyə maarifi işlərinə dəstək kimi bir sıra fəaliyyətlərin icrasını təmin etmişdir.

Dəyirmi masanın digər iştirakçıları – İcra Hakimiyyəti, Mərkəzi Rayon Xəstəxanası, Rayon Təhsil Şöbəsi və hədəf icmaların nümayəndələri də müzakirələrə qoşulmuş, öz rəy və fikirlərini bölüşmüşdülər

Səhiyyənin İnkişafına Dəstək İctimai Birliyi (SİD İB) təlim, texniki yardım və tədqiqatlar vasitəsilə insanların, icmaların və qurumların   inkişaf məqsədlərinə nail olmaları üçün onların bacarıqlarının artırılmasına xidmət edən,  gəlir gətirməyən qeyri-hökumət təşkilatıdır.

Əlavə məlumat əldə etmək üçün Səhiyyənin İnkişafına Dəstək İctimai Birliyinin İctimaiyyətlə Əlaqələr üzrə məsul şəxsi Elsevər Məmmədovla əlaqə saxlaya bilərsiniz:

Tel: 055 882 74 40; 050 250 85 96; 012 428 89 47; Email: office@ahd.az