Çexiyanın Çarlz Universiteti nəzdində fəaliyyət göstərən Amerikan stilli iqtisadiyyat üzrə doktorantura proqramına istedadlı gənclər dəvət olunur. Proqrama qəbul olunanların təhsil haqqı tam maliyyələşdirilir və tələbələr tədris dövrü ərzində aylıq təqaüdlə təmin olunurlar.

Təhsil müddəti 4 ildir. Bunun da ilk 2 ilində tələbələr master, növbəti 2 ilində isə doktor dərəcəsi (PhD in economics) almaq imkanına malik olurlar. İstəyindən asılı olaraq tələbələr təhsili master dərəcəsi aldıqdan sonra dayandıra bilərlər. Tədris ingilis dilindədir və tələbələrin ingilis dili peşəkar müəllimlər tərəfindən daim təkmilləşdirilir. Tələbələrə dissertasiya tədqiqatının bir hissəsini Amerika Birləşmiş Ştatlarında və Qərbi Avropada partnyor institutlarda aparmaq imkanı verilir.

Müraciətlərin qəbulu 28 fevrala qədərdir. Uğurlu abituriyentlər iki aylıq yay hazırlıq kursuna dəvət edilirlər. Bu kursu müvəffəqiyyətlə bitirənlər proqrama qəbul olunurlar. Yay hazırlıq kursunun bütün məsrəfləri proqram tərəfindən ödənilir.